Cefais gyfarfod gyda C sydd yn rhiant i bedwar o blant. Mae plentyn hynaf C wedi derbyn diagnosis o awtistiaeth. Mae ymddygiad merch C yn y cartref yn mynd y tu hwnt i reolaeth ac yn effeithio yn negyddol ar fywyd y teulu. Nid yw ysgol merch C wedi rhoi gwybod am unrhyw broblemau ymddygiad. Roedd C yn teimlo nad oedd ysgol C yn gefnogol ac roedd yn ei chael hi’n anodd cyfathrebu gyda nhw. Awgrymais fod C yn cysylltu â S.N.A.P. Cymru i gael cefnogaeth ac arweiniad ar y mater hwn.
Mae ymddygiad merch C wedi cynnwys gweiddi a defnyddio iaith ymosodol tuag at C a phlant iau C. Mae gan ferch C faterion synhwyraidd hefyd sy’n gwneud ymolchi yn anodd gan arwain at hylendid gwael ac esgeuluso ei hunanofal yn gyffredinol. Dywedodd C wrthyf ei bod yn teimlo nad yw’n gallu ymdopi mwyach ac mae’n derbyn cefnogaeth gan y meddyg ar gyfer iselder. Dywedodd C ei bod yn teimlo weithiau nad yw’n gallu bod yn yr un ystafell â’i merch a bod perthynas o fewn ei theulu ar fin chwalu. Nid yw C yn siŵr pwy ddylai droi atynt na ble i gael cefnogaeth.
Siaradais gydag C am y dewisiadau o ran cefnogaeth a rhoddais fanylion Un Pwynt Mynediad i C. Eglurais oherwydd bod y teulu yn ymylu at argyfwng, byddai Un Pwynt Mynediad yn gallu cynnig cefnogaeth arbenigol i’r teulu. Awgrymais efallai bod C yn gofyn am asesiad gofalwr ac/neu asesiad gweithiwr cymdeithasol. Cyfeiriais C i gysylltu â’i meddyg teulu i gefnogi hyn.
Hefyd, trafodais strategaethau y gallai C eu defnyddio i gefnogi anawsterau synhwyraidd ei merch. Eglurais y strategaethau ymolchi synhwyraidd a ddarperir gan y gwasanaeth cefnogi awtistiaeth integredig.
Hefyd, awgrymais ddefnyddio siart ABC Awtistiaeth Cymru i fonitro ymddygiad a sylwi ar unrhyw batrymau ymddygiad sy’n digwydd. Mae C am lunio llyfr cyfathrebu iddi hi a’i merch yn unig i hybu cyfathrebu rhwng y ddwy ohonynt. Hefyd, awgrymais y gallai C ddefnyddio jar gwobrwyo gyda’i merch i hybu ymddygiad cadarnhaol.
