Ar ddechrau Wythnos Ymwybyddiaeth Awtistiaeth, mae Gweinidog Iechyd y Cyhoedd a Gwasanaethau Cymdeithasol, Rebecca Evans, wedi cyhoeddi y bydd £7 miliwn ychwanegol yn cael ei neilltuo ar gyfer y Gwasanaeth Awtistiaeth Integredig Cenedlaethol.
Cymru yw’r wlad gyntaf yn y DU i greu gwasanaeth cenedlaethol i roi cymorth am oes i blant ac oedolion sydd ag awtistiaeth, a’u teuluoedd. Bydd y gwasanaeth arloesol hwn, a fydd ar gael ym mhob man erbyn 2018, yn darparu gwasanaethau diagnostig newydd ar gyfer oedolion; cymorth i deuluoedd a gofalwyr; cymorth i bontio o ddarpariaethau plant i ddarpariaethau oedolion; a hyfforddiant ar gyfer gweithwyr proffesiynol.
Bydd y £7 miliwn ychwanegol, sydd wedi ei gyhoeddi ar gyfer y pedair blynedd 2017/18 – 2020/21, yn sicrhau y gall pob rhanbarth yng Nghymru ddarparu cymorth cyson a chynaliadwy o ansawdd uchel i’r rheini sydd ag awtistiaeth.
Dywedodd Gweinidog Iechyd y Cyhoedd a Gwasanaethau Cymdeithasol, Rebecca Evans:
“Ers amser maith, mae Cymru wedi bod yn arwain y ffordd o ran darparu cymorth i bobl ag awtistiaeth a’u teuluoedd, gan gyhoeddi ein cynllun gweithredu cyntaf yn ôl yn 2008. Mae’r Gwasanaeth Awtistiaeth Integredig Cenedlaethol yn gam pwysig arall ymlaen. Bydd yn helpu i sicrhau bod y gwasanaethau y mae pobl yn eu derbyn yn rhai cyson a bod pobl ym mhob rhan o Gymru yn cael y cymorth priodol ar yr amser iawn.
“Mae’r cyllid ychwanegol dw i wedi ei gyhoeddi heddiw, ar ddechrau Wythnos Genedlaethol Awtistiaeth, yn dangos ein hymrwymiad parhaus i wella gwasanaethau awtistiaeth. Dw i’n hyderus y bydd y cyllid hwn dros gyfnod o bedair blynedd yn sicrhau y bydd ein rhanbarthau’n gallu darparu cymorth cynaliadwy i deuluoedd.”
Bydd y cyllid hefyd yn helpu i roi ar waith ein Cynllun Gweithredu Strategol ar gyfer Anhwylderau’r Sbectrwm Awtistig. Mae’n cynnwys ymrwymiad i ddatblygu adnoddau awtistiaeth gwell, megis y cynllun newydd “Weli Di Fi?” sydd wedi ei ddatblygu gan Gymdeithas Llywodraeth Leol Cymru a fydd yn cael ei gyflwyno’n raddol yn ystod y misoedd nesaf.
Mae’r fenter hon yn hyrwyddo dealltwriaeth a chynhwysiant mewn perthynas ag awtistiaeth o fewn cymunedau yng Nghymru. Mae’n cael ei lansio heddiw gyda fideo sy’n dangos cefnogaeth gan sêr o’r byd pêl-droed a rygbi cenedlaethol yng Nghymru.
Crëwyd taflenni a phosteri i’w rhoi mewn siopau, banciau, siopau trin gwallt a sinemâu yn ogystal â phractisau deintyddion a meddygon teulu, er mwyn helpu pobl i gyfathrebu â phobl ag awtistiaeth. Gall pobl ag awtistiaeth ddewis a ydynt am wneud pobl eraill yn ymwybodol o’u hawtistiaeth drwy wisgo band llawes neu ddangos cerdyn (a fydd hefyd ar gael ar gyfer ffonau symudol).
“Bydd y cynllun yma, sydd wedi ei arwain gan Dîm Cenedlaethol Datblygu ASA o fewn Cymdeithas Llywodraeth Leol Cymru, yn gam pwysig yn nhermau adnabod anghenion unigolion gydag ASA ar draws cymunedau yng Nghymru. Rwyf yn falch iawn y bydd awdurdodau lleol yn cymeryd hyn ymlaen ac yn chwarae rôl yn hyrwyddo’r ymgyrch. Mae’r Gymdeithas yn croesawu’n gynnes y cyllid ychwanegol sydd wedi ei gyhoeddi gan y Gweinidog, a fydd yn dyfnhau ein gwaith efo unigolion gydag ASA, eu teuluoedd a gofalwyr, a’r rhai sydd yn gweithio gyda phlant ac oedolion gydag ASA.”
